Itong mga huling araw at gabi ay tunay na napakahirap para sa aming magkapatid. Ang paghahanda sa aming pinakamamahal na ina para sa kanyang paglisan.
Umiyak ako sa Panginoon na bigyan ako ng sasabihin sa aming ina na magbibigay sa kanya ng kapanatagan.
Sa kanyang mga huling araw at gabi, ako at si Patrick ay palagi sa kanyang tabi, tangan tangan ang kamay na nag-alaga at nag-aruga sa aming magkapatid.
Nakita namin sa kanyang mga mata ang takot na harapin ang kamatayan na nag-iisa.
Si Hesus ba ay natakot na harapin ang kamatayan? Minahal niya ang buhay dito sa lupa. Para kay Hesus ang kamatayan ay isang kaaway.
Mayroon bang ibang paraan para tayo ay maligtas bukod sa kamatayan sa krus? Wala!
Walang ibang paraan para sa banal at matuwid na Diyos upang mapatawad ang ating mga kasalanan.
Ang pagkabuhos ng banal na Dugo ni Kristo sa Krus ng Kalbaryo ang tanging paraan.
Kung ipagwalang bahala lang ang kasalanan, walang katarungan at ang Diyos ay hindi matuwid. Para sa banal na Diyos, kasuklamsuklam ang kasalanan. (Habakkuk 1:13)
Si Hesus ang naging kasuklamsuklam nang siya ay pinako sa Krus ng Kalbaryo.
Pinasan ni Hesus ang ating kasalanan na parang marumi, luma, at sira sirang damit.
Sa kabila nito, ang katuwiran at kabanalan ni Kristo ay ibinigay sa atin, tulad ng isang bago at malinis na kasuotan.
Ang tawag po dito sa Bible ay "imputation." Kinuha ni Kristo ang ating kasalanan at ibinigay niya sa atin ang kanyang katuwiran, kalinisan, at kabanalan. Napasa atin ito hindi dahil sa ating mabubuting gawa kundi dahil tayo ay "na kay Kristo."
Meron ba tayong maibibigay o magagawa upang tangapin tayo sa langit? Wala! Kung tatangapin mo ang walang bayad na kaloob at magtiwala sa kanyang banal na dugo, ang takot sa kamatayan ay mapapalitan ng katiyakan na langit ang iyong walang hangang tirahan.
"Sapagka't sa biyaya kayo'y nangaligtas sa pamamagitan ng pananampalataya; at ito'y hindi sa inyong sarili, ito'y kaloob ng Dios; Hindi sa pamamagitan ng mga gawa, upang ang sinoman ay huwag magmapuri." (Efeso 2:8&9)
Sulat ni Paige Ignacio
SHARE OBITUARY
v.1.9.5