Yuat Rmah

Ơi Rebeka (Rev. Mlơĭ Rmah)

Thŭn tơkeng: 01-01-1956. Amĭ ama tokeng pơ plơi Keñ Săn, tring Ia Ale, kwar Gialai.

Amăng sang anŏ hơmâo 4 čô ayŏng adơi tui anai: Ayŏng ta jing Mlơĭ Rmah (ơi Rebeka), Jŭ Rmah (ama Jer), Y Uat Rmah (ơi Dany), jing pô glaĭ pơ Plơi Hiam laih, Beo Rmah (ama Phyŏng).

Tơdơi kơ amĭ djai laih, ñu ăt hơdip hăng mơ̆ng anet hlŏng truh pơ 12 thŭn. Tơdơi kơ anŭn ñu nao dŏ hrŏm hăng ayŏng tha ñu, pô pơtô Mlơĭ Rmah wơ̆t hăng ai ñu H’Biat Siu. Ƀiă thŭn tơdơi kơ anŭn, ñu prŏng laih, laih anŭn ñu nao hrăm hră yơh tơdang ñu dŏ hăng ƀing gơmơi. Tơl prŏng ƀiă laih, ñu nao hrŏm hrăm hră pơ Đalat amăng 4 thŭn, aka ƀu pơgiŏng hĭ hăng hơmâo hră Yap Kơnăl ôh, wơ̆t tơdah ñu hrăm abih anih 12 laih yơh.

Tơdơi kơ anŭn, ñu dŏ amăng sang mơnă dua thŭn yuakơ tơlơi arăng thâo hluh soh, pơmĭn kơ ñu ngă bruă pơkơdơ̆ng glaĭ kơ kơnŭk kơna, samơ̆ ñu pô ƀu hơmâo ôh.

Tơdơi kơ anŭn, ñu hơmâo sang anŏ hăng amăng thŭn 1977, laih anŭn dŏ pơ Ƀuôn Sâm B hlŏng truh pơ hrơi dưi đuaĭ rai pơ čar Amer anai yơh.

Yuakơ nanao kơ tơlơi kơpĭ kơpe̱t ƀu rơngai ôh amăng tơlơi pơjơnum kơkuh pơpŭ. Tui anŭn, amăng thŭn 2005 ñu đuaĭ nao pơ čar Kur yơh. Ƀu sui ôh mơ̆ng anŭn, ñu rai pơ čar Amer yơh.

Tơdang ƀing gơmơi nao dŏ pơ Phu Tuc adih yuakơ kâo jing pô pơtô hyu pơlar amăng bruă Khua Yang, ñu dŏ nanao hăng kâo mơ̆ng kâo dŏ pơ Phu Tuc. Nao pơ kâo hlŏng truh pơ hrơi ñu dŏ bơnai amăng thŭn 1977.

Khăp adoh amăng ƀing hlak ai. Ñu juăt đuaĭ hyu hrŏm hơbĭt hăng ƀing hlak ai nao ngă gơ̆ng jơlan kơ arăng kơ tơlơi Khua Yang.

Tơlơi hơdip ñu ƀu thâo hyu pơčuih hăng arăng, ƀôdah thâo mơneč pơrơdjơ̆ pơrơsao hăng ƀing arăng ôh.

Amăng tŏng krah ƀing ayŏng adơi, kŏn thâo pơčuih ngă sat kơ tơdruă lơi.

Tơlơi hơdip hơdơ̆ng rĭm hrơi ngă bruă đang hơma hăng tơlơi triăng biă mă. Amăng abih tơlơi hơdip ñu kơnơ̆ng thâo khăp ngă hơma đôč yơh.

Tơlơi hơdip amăng sang anŏ, thâo khăp kơ amĭ ama, kơ ƀing ayŏng adơi, ƀu thâo pơhiăp sat ƀôdah ngă sat ôh.

Tơlơi hơdip tơlơi đaŏ, ñu juăt nao pơjơnum pơgop hăng ƀing đaŏ nanao triăng biă mă yơh. Ñu laĭ, “Ƀing ayŏng adơi gơmơi, ơi Rebeka yơh jing ayŏng tha, jing kar hăng ama, yă Bereka, jing kar hăng amĭ.” Ñu juăt pơhiăp kar hăng anŭn nanao yơh. wơ̆t tơdah ƀing gơmơi dŏ pơ anih ataih, ñu ăt gir hơduah prăk kiăng kơ rai čuă ngui pơ ƀing gơmơi. Hơmâo ñu hơmư̆ ƀing hlak ai đaŏ jak iâu kiăng kơ nao đuaĭ hyu pơ tơlơi đaŏ, ñu hur har nao mơtam yơh.

Tơlơi hơdip ñu hăng kơnŭk kơna, ñu ƀu hơmâo tĕk wĕk djơ̆ hơget gĕt ôh, samơ̆ yuakơ arăng đi̱ng đaŏ kơ ñu, arăng mă ñu hăng krư̆ hĭ. Tơl arăng pŏk ñu tơbiă mơ̆ng tơlơi đaŏ laih anŭn ƀu rơngai ôh, tui anŭn yơh ñu đuaĭ hĭ pơ čar Kur hơnăl tuč nao truh pơ čar Amer anai yơh.

Truh pơ čar Amer anai, nao mă bruă anih bruă mơnuă arăng. Tơlơi pơgop pơlir amăng sang anŏ, ñu khăp kơ bơnai laih anŭn ƀu brơi kơ bơnai ñu (yă Dany) mă bruă ôh. Hlŏng truh pơ ñu rơngiă, ñu ăt dŏ khăp hăng nanao kơ sang anŏ. Ñu ƀu thâo khăp glông be̱r kơ ƀing ană bă ñu ôh.

Ñu kiăng kơ mă bruă dơ̆ bruă tha sang yang ƀôdah kŏng tha đôč yơh. Hlŏng kơ anŭn dơ̆ng, ñu ƀu pơmĭn kiăng kơ tơlơi jing pô pơtô pơyơr ƀôdah pô pơtô pơjao ôh, yuakơ ñu laĭ, “Ơi Adai kơnơ̆ng iâu kâo mă bruă dơ̆ anai yơh.”

Tui hăng kâo, ñu tŏng ten hăng Ơi Adai, hrăm hră truh anih, thâo pơrơno̱m hăng ƀing ayŏng adơi, hăng sang anŏ, ñu khăp biă mă kơ ană bơnai ñu. Ñu hơmâo klâo čô ană: Pop Rbam, H’Lena Rbam, laih anŭn Moise Rbam. Pop, ană đah rơkơi kơčua, ăt dŏ glaĭ pơ Wietnam. H’Lena, ană đah kơmơi tal sa, dŏ hăng ñu pơ Amer anai, wơ̆t hăng Moise, ană đah rơkơi rơnuč, ăt dŏ hrŏm hăng ñu pơ čar Amer anai.

Moise (ană đah rơkơi tơluč):

Ama kâo thâo gir, hyu ruai tơlơi đaŏ kơ arăng. kiăng hur har mă bruă biă mă. Ñu jing mơnuih thâo ư̆ añ, gir run biă mă. Thâo khăp kơ ƀing ană bă. Ƀu kiăng kơ ƀing ană bơnai tŭ gleh tơnap kar hăng ñu hơmâo tŭ gleh tơnap laih hlak ñu dŏ čơđai ƀu hơmâo amĭ ama.

Tơdang ñu ruai kơ tơlơi ñu nao sĭ kơrem kiăng kơ hơmâo prăk kla sang hră, ñu hrăm hlak hrăm pơ Đalat. Kâo hơmâo tơlơi pơpư̆ pơgơi pran jua biă mă yơh. Ñu ruai ñu kiăng kơ pơgiŏng hĭ tơlơi hrăm wơ̆t tơdah ƀu hơmâo hră yap kơnăl, samơ̆ kiăng kơ thâo tơlơi bruă laih anŭn hơget tơlơi tŭ yua amăng tơlơi hơdip. Ñu pơtrŭt ană bă ñu, jing ƀing gơmơi, gir hrăm hră kiăng kơ thâo mă bruă.

Kâo ƀuh ñu thâo khăp kơ kâo biă mă yơh. Laih anŭn kâo ƀuh tơlơi hơdip ñu ƀu kiăng đo̱m nư kơ arăng ôh.

Ñu ăt pơtrŭt kơ kâo kiăng kơ hrăm pơgiŏng hĭ Tơlơi Hơdip Yang Krist tơdang pô pơtô pơjao gơmơi pơhrăm brơi. Ñu pơtrŭt kơ ƀing gơmơi hrăm lu hloh kơ tơlơi kiăng kơ ƀing gơmơi mă bruă, yuakơ ñu kiăng kơ ƀing gơmơi thâo hluh.

Tơlơi yom pơphan hloh kâo ƀuh ƀơi ama kâo jing mơnuih prŏng tơlơi khăp. Ñu thâo luă gŭ, pơtrŭn ñu pô, tơdu rơun amăng pran jua.

Kâo ƀu thâo wơ̆t bĭt ôh kơ tơlơi anai: Tơlơi ñu khăp thâo pap tơdu rơun kơ ƀing gơmơi jing hiam klă biă mă. Ñu gir run mă bruă biă mă. Ñu ƀu kiăng kơ ƀing gơmơi, jing ƀing ană bă ñu, gleh tơnap. Tơlơi khăp ñu kơ amai jing prŏng yơh, tơl ƀing gơñu rai dŏ pơ Charlotte anai. Ñu ăt khăp kơ ayŏng Pop wơ̆t hăng ƀing tơčô ñu mơ̆n. Ñu pơmĭn ƀơi mông pơdơi tha mơ̆ng bruă mơnuă yơh, ñu kiăng kơ glaĭ ngui. Ñu ăt pơtô kơ kâo kiăng kơ hơdip hơdơ̆ng hiam klă. Ñu pơtô ƀing gơmơi hăng Boh Hiăp Ơi Adai laih anŭn pơhrăm kơ ƀing gơmơi hơdôm boh troh Yang Bơngăt Hiam mơ̆n.

Y Lia Rčam (adơi tŏ yă Dany)

Kâo ƀu ñu mơak biă mă yơh hăng ƀing gơmơi. Ñu pơtô ba brơi kơ ƀing gơmơi jing kar hăng ama yơh, yuakơ ƀing gơñu djai ama. Ñu pơtrŭt kơ ƀing gơmơi kiăng kơ nao hrăm kiăng kơ thâo hluh. Tơlơi khăp kơ ƀing gơmơi, ñu pơtô rơnang blang kơ ƀing gơmơi. Ƀing gơmơi hơmâo pă̱ čô ayŏng amai adơi: H’Đơr Rbam (djơ̆ biă mă ñu, H’Đơr Rčam), H’Liu Rčam (rơngiă mơ̆ng 2008), tŭ tơkeng amăng thŭn 1963), kâo, Y Lia Rčam (ama Biach), Y Ten Rčam (ama Rong). Ai kâo anai mơak biă mă yơh. Wơ̆t tơdah arăng djik djak kơ tơlơi đaŏ ñu, samơ̆ ñu ƀu ngă glaĭ sat kơ arăng ôh. Tơlơi hơdip ñu thâo huĭ pơpŭ kơ Ơi Adai biă mă. Ñu khăp djru kơ ƀing gơmơi. Kâo ƀu tơlơi khăp ñu kơ ƀing gơmơi kơ ƀing arăng jing prŏng biă mă, hiam biă mă. Ñu ƀu hơduah pơrơdjơ̆ hăng arăng ôh. Ñu djru kơ arăng kar hăng ñu djru kơ sang anŏ ană bơnai ñu kar kaĭ mơ̆n. Tơl ngă kơ ƀing arăng ƀu thâo hil nač kơ ñu ôh. Kâo ƀu tơlơi gir ñu jing prŏng, ñu gir tŭ gleh tơnap prŏng biă mă.

Nay Môn (Ơi Jut):

Kâo ƀuh ñu amăng sang mơnă amăng thŭn hlâo adih… Ñu triăng biă mă nao jơnum kơkuh pơpŭ wơ̆t tơdah amăng sang mơnă. Ñu kar hăng adơi kâo biă mă yơh. Kâo thâo mơnuih anai rơun rơmuăn biă mă. Ñu lăng kơ kâo kar hăng ai ñu pô yơh. Tañ ƀlĕ ia mơta biă mă yơh. Arăng hơdơr kơ ñu biă mă yơh…

Jŭ Siu (ama H’Ren):

“Ñu thâo pơhiăp tơdu rơun biă mă kar hăng arăng ruaih hăng blâo mơnŭ, blâo čim yơh. Ngă kơ pran jua tơlơi pơmĭn kâo mơak biă mă yơh.”

Y Kit Nay (Ama Danny):

Kâo ƀuh ñu thâo khăp, thâo ră glai. Kâo ƀu hơmâo pơhiăp hrŏm lu, samơ̆ kâo ƀuh ñu thâo lăng ba biă mă. Ñu mă bruă hăng kâo amăng sang anŏ, đơđa jah rơ̆k, lăng bruă amăng sang. Kâo hơdơr kơ ñu biă mă yơh!

Hlena (Amĭ Danny):

Ñu hơmâo tơlơi khăp kơ kâo lu biă mă yơh, yuakơ kâo jing sa čô ană đah kơmơi amăng sang... Pơpă nao ama le̱ng kơ djă̱ ba hrŏm hăng ñu nanao. Ama ƀu lui kâo dŏ hơjăn păn ôh… kâo ƀu ƀuh ôh ñu dŏ ataih mơ̆ng kâo… kơtang ñu khăp, kơtang ñu hil mơ̆n, yuakơ ñu khăp kơ ƀing gơmơi. Ñu taih pơkra ƀing gơmơi tơdang ƀing gơmơi ngaĭ, ƀu tui, samơ̆ ñu kiăng kơ ƀing gơmơi jing mơnuih, hiam klă. Ñu ngă lu tơlơi bruă hiam kơ ƀing gơmơi…. Ơ ama, kâo hơdơr hăng khăp kơ ih biă mă!

H’Đơr Rčam (Yă Danny):

Ñu khăp kơ kâo biă mă! Ƀing gơmơi ƀu hơmâo tơlơi pơdjơ̆ pơrơsao ôh. Ƀing arăng hơmâo lu mơta tơlơi pơrơdjơ̆ pơrơjăh hăng tơdruă. Ñu pơpŭ kơ kâo biă mă… Ñu thâo pơmĭn kơ bruă kiăng kơ hơdip biă mă. Ñu ƀu mă bruă hrŏm lu đơi ôh, samơ̆ ñu pơphŭn brơi kơ tơlơi bruă, laih anŭn kâo yơh ngă bruă. Ñu thâo khăp kơ sang anŏ, ană bă, laih anŭn thâo blơi gơnam djă̱ glaĭ pơ sang djru kơ sang anŏ. Ƀu lui raih ôh. Ñu thâo ƀlơ̆ng brơi kơ kâo wơ̆t hăng sang anŏ biă mă. Tơlơi buih ƀơ̆ng huă, ñu thâo biă mă yơh. Kâo ƀuh Ơi Adai djru biă mă yơh, kâo pơmĭn yua mơ̆ng tơlơi đaŏ kơ Khua Yang Ơi Adai, anŭn yơh ƀing gơmơi pla kaphê, tiu,… jing hiam biă mă, laih anŭn djŏp biă mă gơnam ƀơ̆ng huă kơ sang anŏ. Mă bruă anet hơmâo anet, ngă bruă prŏng, Ơi Adai brơi hơmâo prŏng mơ̆n. Amăng črăn pluh pơyơr kơ Ơi Adai, ñu tŏng ten biă mă. Djŏp mơta bruă ñu ngă, ñu hơdơr bơni kơ Ơi Adai soh sel.

Hlâo adih, ƀing gơmơi hlak dŏ pơkhăp. Amĭ kâo ƀu brơi dŏ ôh, yuakơ phara plơi pla, ƀu thâo arăng ôh. Hloh kơ anŭn dơ̆ng, ơi Dany đaŏ mơ̆n, jai hloh dơ̆ng yơh ƀu brơi dŏ. Samơ̆ ñu brơi mơ̆n tơdơi anai.

Kâo ƀuh ñu hơmâo tơlơi đaŏ prŏng biă mă. Ƀơi trŏp ia đang hơma glai anŭn hơmâo yang sat dŏ. Ƀu hơmâo hlơi pô ôh dưi ngă hơma amăng glai anŭn. Tơdah hlơi pô nao ngă, pô anŭn djai hĭ yơh yuakơ yang sat pơrai. Tơdơi kơ anŭn, ñu hăng sa čô pô pơtô ơi ama Tet rai hrŏm hăng ñu kiăng pioh mông iâu laĭ. Ñu pioh mông iâu laĭ ƀơi anih anŭn. Tơdơi kơ klâo hrơi, ƀing gơñu nao ep, samơ̆ hră Tơlơi Ơi Adai Pơhiăp ăt dŏ dơnơ̆ng ƀơi anih anŭn. Hơnăl tuč, ƀing yang rơba̱ng mơ̆ng anih anŭn tơbiă đuaĭ hĭ abih yơh. Lu ƀing arăng rơpơi ƀuh kơ tơlơi ƀing ană plơi yang amăng anih anŭn čŏk hia tơbiă đuaĭ yuakơ Ơi Adai, Yang ơi Danny hăng pô pơtô ơi ama Tet dưi hĭ laih. Čơdơ̆ng mơ̆ng anŭn, ƀing gơmơi hơmâo tơlơi bơni hiam mơ̆ng Ơi Adai djŏp mơta yơh.

Kâo hơdơr khăp kơ ih biă mă ama ñu ăh… Ƀu hơmâo hơget ôh dưi pơplih hĭ tơlơi khăp tơlơi pap ta!

Then Rahlan (ama Thu):

Kâo ƀu thâo krăn ôh hlâo adih pơ Wietnam. Tơl amăng thŭn 2004, hlak dŏ pơ anih pơjưh pơ Kur, kâo čơdơ̆ng thâo krăn ñu yơh. Ƀu kơƀah ôh tơlơi pơhiăp iâu nao rai. Tơdang dŏ amăng North Carolina anai, ñu nanao yơh jak iâu pơhiăp hrŏm hăng kâo kiăng kơ pơgop. Tơdơi anai, kâo laĭ hăng ñu yuakơ ñu jak iâu rai pơjơnum, “Kâo, pran jua kâo, tơlơi pơmĭn kâo ƀu nao pơ anih pơkŏn dơ̆ng tah. Pơ anih ih yơh.” Tơl amăng dua thŭn anai laih, kâo pơgop hrŏm hăng ñu. Kâo hơdơr kơtang biă mă jing tơlơi ñu pơtrŭt kơ tơlơi pơgop, “Rai bĕ, hlơi kơ ƀing gih dơ̆ng lĕ. Rai bĕ, anăm dŏ hơjăn ôh. Pơgop bĕ!” Kâo hơdơr kơ ih biă mă, wa ñu ăh.

Hendy hăng Hayit Siu (amôn ñu):

Kâo ƀuh ñu thâo gir run, tơdu rơun biă mă. Pran jua dŏ hơđơ̆ng ƀu pơpư̆ pơgơi ôh tơdang hơmư̆ lu mơta tơlơi rŭng răng truh ƀơi anih pơjơnum anai. Ñu juăt pơtrŭt pơđu̱r kơ kâo kiăng kơ pơhiam pơsir hĭ tơlơi bruă hơget năng kiăng kơ ngă.

Kâo hơdơr biă mă yơh, met ăh! Ih hơduah tơlơi thâo pơrơno̱m, thâo pơgop mă bruă hrŏm hơbĭt. Kâo ƀuh ih luă gŭ pơtrŭn pô biă mă amăng anih pơjơnum anai. Ơ met, kâo hăng sang anŏ kâo khăp kơ ih biă mă, yuakơ ih čơdơ̆ng mơ̆ng čơđai, kâo hơdơr ih khăp kiăng kơ kâo mơ̆n tơdang dŏ hrŏm hăng amĭ ama đưm hlâo adih. Ih jing tơngan gah hơnuă yơh kơ anih pơjơnum ta anai, kiăng kơ rŭ̱ pơdơ̆ng đĭ tơdruă amăng Khua Yang. Ih jing pô ba akŏ hiam biă mă kơ abih bang ƀing gơmơi.

Ơ met, ƀing gơmơi hơdơr khăp hơeng kơ ih biă mă! Ƀing ta či bưp glaĭ tañ biă mă tơdang dŏ mă bruă kơ Ama ta hlâo kơ ƀing ta nao pơ Plơi Hiam adih! Bơni kơ Ơi Adai, hơmâo brơi kơ ƀing gơmơi thâo bưp ih hlâo kơ ih glaĭ pơ Sang Ama!

Phon Nay (ơi Jimmy):

Ñu pơtrŭt pơđu̱r kâo biă mă amăng tơlơi pơgop pơlir hrŏm hơbĭt amăng sang pơjơnum tui anai, “Ih anăm đuaĭ hyu pơ anih pơkŏn dơ̆ng tah hŏ. Pơgop hăng tơdruă ta pơ anih anai yơh kiăng kơ mă bruă kơ Khua Yang Ơi Adai.”

H’Lin Eban (amĭ Sakari):

Kâo ƀu ƀuh ñu pơhiăp sat kơ kâo ôh, kŏn pơhiăp pơhiăn hơget gĕt ôh. Ƀing gơmơi ƀuh ñu hơdip hiam biă mă hăng ƀing gơmơi. Ñu kiăng kơ kâo biă mă yơh tơl kâo lui hĭ plơi pla kâo rai dŏ kơ adơi ñu. Kơ ƀing ană bă kâo ñu khăp biă mă yơh. Bơni kơ ñu lu biă mă yơh kơ abih bang tơlơi ñu ngă brơi laih.

Yă Dơl (amĭ Ñuă):

Kâo hơdơr biă mă kơ ñu, yuakơ ñu juăt hyu hơduah jrao brơi kơ kâo… Kâo khăp biă mă kơ ñu. Ñu thâo djru kơ kâo mơ̆n. Ƀu hơmâo mơnuih djru kơ kâo ôh, samơ̆ ñu thâo djru kơ kâo. Thâo buih ƀơ̆ng, thâo tơlơi Yuăn djru brơi kơ kâo. Tơlơi hơdip ñu hiam biă mă yơh. Ñu ăt hơmâo tơlơi đaŏ mơ̆n, tui anŭn, kâo mơak biă mă yơh tơdang ñu rai dŏ hrŏm amăng sang anŏ anai. Ơ ană, kâo hơdơr kơ ih biă mă yơh!

Ueo Ksor (ama Pun):

Tơlơi hơdip ñu thâo pơrơno̱m biă mă. Ñu yơh jing pô djru kơ bruă amăng Sang Ơi Adai pơ plơi anai. Ñu yơh jing pô djru hrŏm hơbĭt amăng bruă Sang Ơi Adai ƀon Sâm anai. Tơlơi dŏ dơ̆ng ƀơ̆ng huă ƀu hơmâo tơlơi hơget ôh sat. Kâo hơdơr biă mă kơ ñu kơ tơlơi djru pơtơgŭ đĭ tơlơi đaŏ amăng ƀon Sâm pơanai. Tơdơi kơ ñu rơkŭt laih, kâo yơh tŏ tui djă̱ bruă amăng sang Ơi Adai anai.

Amĭ ama Emily:

Kâo ƀuh ñu djru kơ kâo (ama Emily) prŏng biă mă, tơl ñu djru kơ kâo thâo hluh hăng đaŏ kơnang kơ Yang Yêsu. Čơdơ̆ng mơ̆ng anŭn, kâo juăt nanao yơh rai jĕ giăm kơ sang anŏ. Tơl dŏ kơ amĭ Emily, ñu yap kơ kâo jing kar hăng sang anŏ ană bă ñu pô yơh. Ñu thâo pơtô laĭ kơ ƀing gơmơi kiăng kơ thâo khăp pap kơ tơdruă. Ñu laĭ, “Ih yơh jing ayŏng tha amăng sang anŏ anai. Ih yơh jing pô djru ba ƀing adơi đeh ih anai.”

Ƀing gơmơi ƀu thâo wơr bĭt ôh kơ tơlơi tơdang pơkra đĭ sang dŏ, ƀing gơmơi ƀuh ñu hăng amĭ prŏng yơh rai djru kơ ƀing gơmơi. Ñu ƀu lui raih hĭ ƀing gơmơi ôh. Ñu thâo lăng ba ƀing gơmơi biă mă yơh.

Pop Rčam (ama Sany):

Ñu rong ba kâo čơdơ̆ng mơ̆ng anet. Ñu thâo djru kơ kâo prŏng biă mă yơh. Ñu pơtô kâo lu biă mă yơh yuakơ ñu kiăng kơ kâo prŏng tui amăng tơlơi thâo hluh đĭ kơyar amăng tơlơi hơdip. Ñu djru kơ kâo amăng tơlơi kơƀah mơ̆n. Ñu gring ba kâo amăng tơlơi đaŏ kơnang kơ Khua Yang. Ñu râo mơdưh ƀing gơmơi kiăng kơ pioh mông iâu laĭ. Ñu ăt thâo pơtrŭt pơđu̱r kơ ƀing gơmơi. Ƀing gơmơi, boh nik ñu ană kâo đah kơmơi, kiăng kơ ñu glaĭ ngui pơ Wietnam anai. Abih bang ƀing ană plơi pla pơ anai ăt dŏ hơdơr kơ ñu lu biă mă yơh. Đơđa mơnuih pơanăn ană gơñu hrup hăng anăn ama, yuakơ pơmĭn kiăng kơ thâo buih ƀơ̆ng. Ama, kâo khăp kơ ih, kâo hơdơr kơ ih biă mă yơh!

Blui Nay (amĭ ama Vina):

Kâo kiaŏ tui ñu mơ̆n, tơl nao pơ New Burn. kâo tui mơ̆n. Kâo ƀu thâo wơr hơbĭt hĭ ôh. Ñu thâo pơmĭn biă mă. Tañ thâo hluh amăng tơlơi pơyap mrô. Kâo hơdơr kơ ñu thâo buih ƀơ̆ng huă biă mă pơ plơi Sâm. Tơdah ñu hrăm nanao, kâo pơmĭn ñu thâo biă mă yơh. Kâo ƀuh ñu thâo đơi. Tơlơi pơmĭn ñu pơmĭn huĭkơ kơƀah kiăng, tơl pơdŏp hĭ tơlơi ruă nuă ñu. Kâo hơdơr biă mă kơ ñu! Kâo honing kơ ñu biă mă!

Kâo (amĭ Vina) rai pơ sang anai, ƀuh ñu dŏ đih ƀơi sang ia ƀu hơdơr dă dơ̆ng tah. Anŭn jing ƀơi 5 mông klăm. Rơngot yơh kơ tơlơi anŭn.

Ƀing gơmơi rai pơ čar Amer anai, tơdah ƀu hơmâo mơ̆ng ñu, sĭt ƀing gơmơi tơnap biă mă yơh kiăng kơ truh. Ñu thâo djru đơi kơ ƀing gơmơi. Ñu laĭ, “Kâo rai pơ čar Amer anai ƀu djơ̆ kơ tơlơi kơƀah kiăng ôh, samơ̆ rai yuakơ kiăng hơmâo tơlơi rơngai kơ tơlơi kơkuh pơpŭ kơ Ơi Adai.” Ƀing gơmơi ƀu thâo wơr bĭt hĭ ôh abih bang tơlơi bruă ñu hơmâo djru brơi laih kơ ƀing gơmơi. Ơ adơi ăh, ƀing gơmơi hơdơr kơ ih biă mă!

Khe Rmah (ơi yă Tôn):

Kâo hơdơr kơ ñu kơ tơlơi ñu nao pơjơnum glaĭ ƀing gơmơi kiăng kơ pơkô̆ pơjing anih pơjơnum. Ñu thâo pơtrŭt pơđu̱r ƀe̱l dui ba kâo kiăng kơ thâo mă bruă kơ Ơi Adai. Ñu pơjing hăng kâo kar hăng adơi ayŏng amăng tơlơi đaŏ. Ñu ƀu khĭn pơhiăp pŏp pŏp ôh, samơ̆ kơnơ̆ng pơhiăp pơwang đôč hăng arăng kiăng kơ pơsir hĭ tơlơi bruă kơƀah kiăng amăng anih pơjơnum. Ñu djru kơ kâo kiăng kơ thâo pơgăt rơdeh. Kâo ƀuh ñu yơh jing ayŏng tha ba akŏ amăng anih pơjơnum. Luă gŭ biă mă yơh! Kâo hơdơr kơ ñu biă mă!

Bol Siu (ơi Hân):

Kâo hơdơr ƀing gơmơi pơbliŭ amăng đang hơma hrŏm hơbĭt. Ñu ƀu thâo pơhiăp sat kơ arăng đơi ôh. Kâo ƀu ƀuh ñu pơhiăp pơgao pơang ôh. Thâo buih ƀơ̆ng djru kơ sang anŏ ñu prŏng biă mă yơh. Ñu ƀu wơr ôh kơ kâo đơđa iâu pơhiăp hrŏm. Ñu ƀu thâo pơhiăp pơruă pran jua arăng ôh, samơ̆ nanao kơ tơlơi kiăng kơ pơmơak pơhiam pơsir hĭ mơta tơlơi bruă ƀu hiam klă. Kiăng kơ thâo pơrơno̱m, gir biă mă amăng tơlơi đaŏ kơnang kơ Ơi Adai. Kâo hơdơr biă mă kơ ñu!

Djin Rahlan (ama Djuan):

Kâo bơni biă mă kơ met (ơi Dany). Kâo lăng ñu jing kar hăng met hăng ama. Kâo ƀu ñu thâo pơhiăp tơdu rơun biă mă, ƀu pơruă hơtai pran arăng ôh. Ñu jak kâo nao pơjơnum hrŏm hăng ñu. Kâo kơnang kơ ñu biă mă kiăng kơ djru gring ba kâo. Kâo mơak biă mă yuakơ thâo krăn ñu. Kâo ƀuh tơlơi hơdip ñu hiam klă biă mă. Kâo hơdơr biă mă kơ ñu! Bơni kơ Ơi Adai!

Drui Siu (ơi Dua):

Kâo ƀu ñu pơhiăp tơdu rơun biă mă mơ̆ng đưm adih laih. Kâo thâo krăn ñu čơdơ̆ng mơ̆ng thŭn 1966 pơ plơi Kli, Phŭ Ñơn adih. Ñu jing phung wang gah ama kâo, jing phung Rmah. Ama ñu hăng amĭ kâo jing phung wang thâo krăn nao rai. Ñu pơtrŭt pơđu̱r kâo kiăng kơ rai pơjơnum pơgop hrŏm hơbĭt. Ñu ăt čơmah mơ̆n, pha kơ kâo sum ao wes. Kâo bơni kơ ñu biă mă. Kâo ƀu thâo wơr ôh kơ tơlơi anŭn!