Mee Xiong

Peb niam lub npe hu ua Mim Xyooj. Nws yug thaum lub 12 Hlis tim 31 xyoo 1921 nyob rau lub zos Hauv Toj, xeev Huam Phas, teb chaws Los Tsuas. Nws txiv hu ua Nyiaj Thoj Xyooj niam hu ua Tooj Liab Thoj. Peb niam nws muaj 3 tug nus thiab 2vid ncaus, xam tag nrho lawv muaj 5 tug nus muag.

Nyob rau xyoo 1957 peb niam Mim Xyooj thiab peb txiv Nyiaj Yig Muas thiaj tau sib qaws los ua txij ua nkawm. Txoj hmoo zoo nkawd ua lub neej nyob kaj siab lug nrog luag muaj tub muaj ki xws teb xws chaw. Nkawd muaj 3 leeg tub xws li: Tooj Kub Muas, Txawj Huam Muas, Yaj Muas thiab 2 leeg ntxhais xws li: Maiv Mim Muas thiab Ntxhi Muas yog niam Zam Muas Vaj. Peb niam Nws muaj 3 txwm tub nyab ib txwm ntxhais vaud. Tag nrho peb niam cov tub nyab ntxhais vaud xeeb leej xeeb ntxwv muaj tag nrho yog 59 leej, nyob ua ke rau teb chaws Amesliskas no.

Xyoo 1959 tsov rog tsuas muaj loj zuj zus thiab tuaj ze zuj zus rau ntawm peb niam lawv tej zej zog. Peb txiv thiaj tau mus ua ib tug tub rog tiv thaiv lub teb lub chaw. Hmoov tsis zoo peb txiv kuj tau mus raug mob nyob rau tom tshav rog hnyav heev lis thiaj ua rau nws ib sab taw tu lawm. Peb Niam txoj kev khwv kev txom nyem thiaj tsuas muaj loj zuj zus tuaj xwb. Nruab hnub hmo ntuj peb niam tsis yog los tu nws cov me nyuam xwb nws tseem los tu peb txiv thiab. Peb niam yog ib leej nyab tsis nrog luag ntau ncauj ntau lus. Peb niam muaj hmoo tau zoo niam pog, pog nyab ua lub neej sib hlub sib pab tam vid ncaus. Nkawv ob tug mos nyab sib pab khwv rau tej me nyuam noj me nyuam hnav kom txhob ntshaw luag.

Tom qab teb chaws Los Tsuas tau poob mus rau tog Koos Sam lawm. Peb niam thiab peb txiv thiaj tau txiav txim siab coj tsev neeg khiav tuaj mus rauThaib Teb nyob rau xyoo 1983. Tau tuaj mus nyob rau lub yeej thoj nam tawg rog Chieng Kham. Txoj hmoo tsis muaj xyoo 1986 peb txiv kuj tau tas sim neej lawm. Ua neeg thoj nam kev noj kev nyob los yeej txom nyem heev kawg li. Nyob rau xyoo 1988 Peb niam thiaj txiav txim siab coj peb cov me nyuam tuaj mus nyob rau teb chaws Asmesliskas. Peb niam tau tuaj nyob rau hauv lub xeev California, nroog Fresno, ua ntu zu los txog rau thaum lub 10 Hli tim 14 xyoo 2014. Tom qab ntawd peb niam thiaj tau los nyob rau lub xeev NorthCarolina no lawm. Thaum lub 12 Hlis tim 4, 2015 thaum 5:30 sawv ntxov nws thiaj li tau tso peb cov me nyuam tseg qi nws lub qhov muag ncaim peb cov menyuam mus yam tsis muaj hnub yuav rov qab los lawm. Peb niam los ua neej nyob rau hauv ntiaj teb no tau 93 lub xyoo, 11 lub hlis thiab 27 hnub.

Peb niam yog ib leej niam nquag, siab dawb siab zoo thiab siab loj siab dav, nws hlub peb kawg nkaus li. Nws txoj kev hlub uas nws muab rau peb cov tub nyab, ntxhais vaud, xeeb leej xeeb ntxwv tsis hais sab nraum sab hauv sib luag zos. Nws ib txwm qhia kom peb paub ua zoo neeg thiab ua ncaj neeg. Kom “Hlub lwm leej lwm tus ib yam li yus hlub yus lub ntsiab muag. Peb niam qhia rau peb tias ua neej nyob txawm yuav txom nyem npaum li cas los xav kom ua lub neej nyob kaj siab lug xwb. Txawm yuav noj mov qhuav ntxuag dej xwb los zoo dua li mus nyiag luag tug los ua yus li. Ua neeg siab dawb siab zoo siab ncaj txoj kev zoo thiaj yuav nyob nplua mias mus ib txhis.”

Peb niam ua lub neej nyob laus nkoos plaub hau dawb paug cuag cag dos yog lub mom yeej koob nqi zog ua zoo neeg. Ua zoo neeg yog hauv kuab muaj tsuas cawm cov zoo neeg. Ua neeg ncaj yog qhov chaw tsom faj rau tsoom neeg ncaj. Peb yuav cim thiab yuav khaws peb niam txoj kev hlub, kev nquag, thiab lub siab dawb siab zoo mus tsis tas tsis kawg. Mus zoo koj mog peb niam tus neeg zoo.