Vam Pov Hawj yug lub 5 hlis ntuj vas thib 7 xyoo 1935 nyob rau Nplog Teb Xeev Xias Khuam lub zos hu ua Phiaj Zeb Thab Taas Nplee. Nws niam nws txiv hu ua Ntxhoo Yeeb Hawj thiab Maum Xyooj. Nws muaj 1 tug kwv thiab 4 tug muam. Xyoo 1943, nws khiav mus nyob rau lub zos hu ua Phuam Laib Khas Khaib, Xeev Xias Khuam.
Xyoo 1960, Vam Pov Hawj pib ua tub rog rau Nai Phoo Vaj Pov. Ib xyoos tom qab ntawd, nws thiab Mim Vaj nkawv sib sau los ua lub neej. Nkawv sib yuav nyob rau lub zos Quav Tshis, Xeev Xias Khuam. Nws niam tais thiab yawm txiv hu ua Nyiaj Xeeb Vaj thiab Maib Lauj. Xyoo 1962, Vam Pov thiab nws pojniam nkawv khiav mus nyob rau nroog Looj Ceeb.
Thaum nws ua tub rog rau Nai Phoo Vaj Pov, nws thiab nws pab tub rog tau mus tua rog nyob rau Roob Xam Xoj, Tiaj Rhawv Zeb, Roob Phuv Pham Thiv, Nroog Xaim Loos, thiab ntau ntau qhov chaw. Nws ua tub rog txog xyoo 1975. Thaum teb chaws tawg Vam Pov thiaj coj nws tsev neeg khiav tawm nroog Looj Ceeb mus nyob rau cov zos xws li zos Hav Nplej Hiab, zos Phom Phais, thiab zos Moos Oo.
Xyoo 1979, Vam Pov tau coj nws tsev neeg khiav mus rau Thaib Teb. Lawv los li 14 hnub thiaj los txog rau ntug Naab Khoom. Thaum li 9 moo tsaus ntuj Thaib thiaj caij nkoj tuaj tos lawv tsev neeg. Lawv caij nkoj mus txog ib nrab deg ces Thaib muab lawv cov nyiaj khuj tag tiamsis Thaib kuj thauj lawv hla dej mus txog Thaib Teb. Thaib coj lawv mus nyob rau lub zos kaw neeg hu ua zos Xoom Kaus Thaus ze Noom Khais. Lawv nyob tau ib hlis ntau xwb ces thiaj li raug xa mus nyob rau nroog Ban Vib Nais.
Thaum lawv los nyob hauv Ban Vib Nais, Vam Pov kuj raug xaiv los ua ib tug Nai Npaab. Nws tau saib xyuas li 10 tawm tsev neeg. Thaum Thaib xa nqaij xa txhuv thiab xa zaub tuaj nws yog tus los muab cov khoom ntawd faib rau cov tib neeg. Tsis tas li ntawd xwb nws kuj ua teb cog nplej cog kab tsib thiab cog qos.
Xyoo 1988, Vam Pov thiab nws tsev neeg tau tawm hauv zos Ban Vib Nais tuaj rau zos Phanat Nikhom. Nws tau tuaj kawm ntawv English thawj thawj zaug. Vam Pov kuj kawm tau zoo heev. Tom qab li 6 lub hlis nws thiab nws tsev neeg thiaj tuaj rau Teb Chaws Meskas. Lawv caij dav hlau tuaj tsaws rau San Francisco ces cov kwv tij tos lawv los nyob rau lub zos Stockton, California.
Vam Pov Hawj thiab Mim Vaj muaj 4 leeg tub thiab 3 leeg ntxhais: Mos Khab, Ntxhoo Pov, Vam Lauj, Ntxoov Lis, Paj Nyiag, Sua, thiab Joseph. Nkawv muaj 27 xeeb ntxwm and 5 great xeeb ntxwm.
Vam Pov thiab nws tsev neeg tau los ntseeg Vajtswv. Nws tau ua kev cai rau dej thiab txais Yexus los ua nws tus tswv. Vam Pov yog ib tug txiv tsev siab dawb siab zoo, nws hlub kwv tij neej tsa txhua leej txhua tus, nws hlub nws tej tub tej nyab tej ntxhais tej vaus thiab tej xeeb ntxwv. Nws qhia kom sawvdaws ua neeg zoo ib leeg hlub ib leeg. Lub 2 hlis ntuj tim 14, xyoo 2020, Vam Pov tau mus nrog Vajtswv nyob lawm.
SHARE OBITUARY
v.1.8.18