Tong Yang Lee

Tooj Yaaj Lis yug rua lub zog Moos Nyaas Xeev Xieng Khouang tebcaws Los Tsuas, Tooj Yaaj txiv hu ua Tsaav Xaab Lis, nwg nam hu ua Lag Koo kws yog Xeev Kaub Koo tug ntxhais. Xyoo 1953 Tooj Yaaj yuav Maiv Huas Yaaj kws yog Nyaj Lauj Yaaj tug ntxhais hab ob tug muaj 11 leeg mivnyuas. Cov tub yog: 1. Txaj Nchai & Nyaab, 2. Nyaj Zeb & Nyaab, 3. Ntsum Npis & Nyaab, 4. Txawj Tub & Nyaab, 5. Nplooj & Nyaab, 6. Kaav & Nyaab, 7. Moos & Nyaab. Cov ntxhais yog: 1. Paaj & Vauv Tooj Txhim Muas, 2. Sua & Vauv Txhoo Vwg Vaaj. Ob tug tu cov tub ntxhais yog Ntxhoo Yeeb & Nyaab, Ntsuab Yag taag sim neej lawm tshuav nyaab hab nwg 2 tug tub 3 tug ntxhais, Vaam Foom & Nyaab, Num Tsaab, hab nyaaj Phuab (N. Nplaj Xaab Vaaj)

Tug nam thib ob muaj 2 tug ntxhais coj lug yog Maiv Paaj & Vauv Tswv Yaaj Xyooj hab Ntxhais & Vauv Hao Xyooj. Tooj Yaaj tug nam thib peb tsi muaj tub kis.

Taagnrho Tooj Yaaj cov xeebntxwv muaj 39 leej hab muaj 16 leej nyuas tshub ( Xeeb ntxwv tam ob )

Nwg muaj ib tug Tijlaug yog Nyaj Pov Lis, taag sim neej xyoo 1967 lawm. Nwg muaj ib tug muam Vaab, kws yog Nam Nchaiv Foom Hawj.

Peb puj tug quasyawg tib ob yog Ntsum Ntxawg Vaaj. Tooj Yaaj cov kwvtij lug ntawm Ntsum Ntxawg Vaaj yog Txaj Tswb Vaaj, Mim Vaaj (NamTxawj Lwm Lauj), nwg taag sim neej nplog teb, hab Vaab Vaaj (Nam Nyaj Yig Xoom), nwg tau taag sim neej nyob Seattle, WA.

Xyoo 1950, Tooj Yaaj tau moog kawm Vaajlugkub nyob rua huv Xeev Xieng Khouang hab tawm moog paab cov ntseeg le ib ob hlis. Nwg rov moog kawm dlua hab lug paab cov pawg ntseeg Haab Poom, Phu Xaab Naib, lug txug rua xyoo 1955 tau tshais chaw moog nyob rua Phu Kaas, hab moog nyob rua Phu Xev Naib

Xyoo 1958 moog nyob rua Phu Qhuab, hab ua xwbfwb rua pawg ntseeg txug 1961 tau moog nyob Moos Pheeb xaa rov moog kawm Vaajlugkub ntxiv tom qaab kawm taag raug xaa moog nyob pawg ntseeg Qhab Mub nyob Haam Kaab. Tom qaab ntawm tau moog nyob rua pawg ntseeg Moos Cab, 1964

Nwg tau txais lub meejmom ua nai koo hab tau lug ua tug teev ntawv rua huv lub Moos Noom Hej kws yog ua tug teev ntawv rua Cob Moos Neej Thoob Lis.

Xyoo 1955 lug txug rua xyoo 1960 nwg yog ib tug khwv noj khwv haus ua laj ua teb coj lub cuab lub yig. Vim lub teb lub chaw tsi thaj yeeb, nwg tau coj tsoom kwv tij neej tsaa tawm lub zog Phu Qhuab lug nyob rua zog Phav Kheb Moos Pheeb.

Lub sijhawm tso kev tsi ua xwbfwb lawm, Tooj Yaaj txhaj moog nyob rua huv lub nroog Xaas Thoos, lug ua dlejnum paab rua lub teb lub chaw lawm. Xyoo 1969, nwg tso teg num ua tug teev ntawv rua lub Moos Noom Hej lawm, nwg txhaj lug nyob rua Nasxus txug nub tawm teb chaws.

Vim lub teb chaw poob rua koos xaam lawm, lub 6-18-175, Tooj Yaaj txhaj coj nwg quaspuj mivnyuas tawm moog nyob rua Thaib Teb txug rua 11-11-1978, Tooj Yaaj hab nwg tsev neeg tuaj rua USA nuav rua lub nroog Santa Ana. Xyoo 1981, nwg lug nyob rua Merced, CA, xyoo 1994 lug nyob rua Sacramento, CA, xyoo 2003, moog nyob rua St. Paul, MN, 9-23-15, lug nyob rua North Carolina. Hab 10,-20-2016, Tooj Yaaj txhaj lug nyob rua huv Banning, CA. Lub 3-9-2017, 4:15 AM yog nub kws nwg tau ncaim peb moog lawm.

Tooj Yaaj Lis yog ib tug tuabneeg sab dlawb sab zoo, sab luj hab sab ntev. Nwg hlub kwvtij neej tsaa txawm yog moob, phub thawj los tsuas los nwg hlub. Tug hlub tug yau los nwg nyam nrug thaam huvsi le yaav kws nwg tseem khov kho tsuav nwg has lawm tes luas yuavtsum yuav xwb. Txhua yaam kws nwg ua hab nwg has mas nwg yeej has yog hab ncaaj nceeg xwb. Nwg has tas yog ces nwg has tas yog, yog has tas tsi yog ces nwg yeej qha kag tas koj ua tsi yog. Nwg yeej ua kuas hum txhua tug sab xwb. Tooj Yaaj lub neej lug ua peb ib leej txiv ces ca xaus le nuav es moog zoo koj os peb leej txiv tug sab zoo hab hlub peb.

Arrangements under the direction of Weaver Mortuary, Beaumont, CA.